تبریز سسی : آشاغيدا وئريلن يازي " موختصر آذربايجان تاريخي " کيتابي نين 10-11 و 12 صحيفه لرينده " اؤن سؤز " بؤلومونده درج اولونموشدور. کيتابين سونوندا قئيد ائديلديگي کيمي کيتابين تأليفي 5/11/1999 تاريخينده سونا چاتميشدير. کيتاب بو تاريخدن سونرا چاپ اولونموشدور. کيتابين اوز قابيغيندا چاپ اولونان بايراغين آي و اولدوزو قارا رنگه بويانميشدير. آي و اولدوزون قارا رنگده اولماسي حاقدا کيتابدا لازيمينجه ايضاح وئريلميشدير.
بو بايراق طرحيندن رحمتليک ائلچي به يين خبري اولماديغيني دئينلر و بو زاويه دن موخاليفت ائدنلر وار. اونلار دئيير کي، ائلچي بي گونئي آذربايجان اوچون يئني بايراق اؤنريلمه سييله موخاليف اولموشدور و او مرحومون سؤزلريندن بعضي اؤرنکلر ده وئريرلر. اونون سؤزلريندن وئريلن اؤرنکلرين هاميسي 1999 ايليندن اؤنجه لره قاييدير. اؤرنه یين، قروپلاردا ائلچي به يدن قيسسا ويدئو لئنت قويموشلار کي، اورادا ائلچي بي گونئي آذربايجاندا يئني بايراغين يارانماديغيندان سؤز ائدير. بو ويدئو لئنت 1997 ايلينه عاييددير. آشاغيدا وئريلن يازي 1999 تاريخي نين سون گونلرينده " موختصر آذربايجان تاريخي " کيتابيندا يازيلميشدير. قارا آي و اولدوزلو طرح ايله موخاليفت ائدنلرين بير قيسمي ائلچي به يين بونونلا موخاليف اولدوغونو ايديعا ائديرلر!!! اونلار اؤزلري هم ده دئييرلر کي، ائلچي بي دئييلن کيتابي اوخوموش و اونون حاقيندا حتّی ايصلاحي فيکيرلر ده وئرميش و سونرا باب تشکيلاتي نشرياتي طرفيندن چاپ اولا بيلمه سيني دئميشدير. ائلچي بي هم ده کيتابدا گلن همن طرحين حاقيندا سوروشموشدور، و سونرا (بو دا بير فيکيردير) دييه اونون چاپ اولونماسيني مانع سيز بيلميشدير. ائلچي به يين بو مسئله ايله موخاليف اولدوغونو ايديعا ائدنلر کيتابين چاپ تاريخيندن سونرا (سند و بلگه) وئرمه ليديرلر.
ائلچي به يين کيتابين چاپيندان سونرا نظري دييشيب و گونئي آذربايجانا اؤنريلن بايراق ايله موخاليفت ائتسه يدي، حتمن بير يئرده چيخيش ائدردي. ائلچي به يين سؤزو گئدن طرحي ايله موخاليفتيني دئينلر عاغلا باتان دليللر وئرمه ليديرلر. بير حالدا کي مرحوم ائلچي به يين بو طرح ايله موخاليفتينه هئچ بير سند يوخدور. سند وارسا، بونو ايديعا ائدنلر يايماليديرلار تا هامي بيلسين. بوندان باشقا بايراق طرحي ياييلديقدان سونرا اونون حاقيندا بير چوخ گونئيلي و قوزئيلي سويداشلاريميز ائلچي به يه موراجيعت ائده رک کيتابدا گلن بايراق حاقدا اوندان سوروشموشلار و او ايسه بونو تأييد ائتميشدير. بونا چوخلاري شاهيدديرلر. او اينسانلار ميللي مسئوليت حيس ائديرلرسه چيخيش ائتمه لي و بو حاقدا دانيشماليديرلار. بايراق قاورامي چوخ جيدي مسئله دير و ائلچي بي گونئي آذربايجانا اؤنريلن بايراقلا مووافيق اولماسايدي باب طرفيندن ياييلان کيتابدا گلمه سينه بو راحاتليقلا ايذين وئرمزدی.
ائلچي بي ندن اؤنجه لرده گونئي آذربايجاندا يئني بايراق يارانماياجاق دئميش و سونرا 1999–دا گونئي آذربايجانا اؤنريلن بايراق ايله مووافيقت ائتميشدير؟ بونون موختلیف دلیللری اولا بیلر. او جومله دن:
-1 ائلچي بي، اؤنريلن آي و اولدوزو قارا رنگده اولان بايراغي قوزئي آذربايجان بايراغي ايله بير اولدوغونو بيلميشدير. يعني گونئي و قوزئي آذربايجان بيرلشنده گونئي آذربايجان بايراغي نين آي و اولدوزونون قارا رنگی سيلينيديگينده، اوندا ايکي طرفين بايراغي واحيد و بير اولاجاقدير.
2- ائلچي به يين گونئي آذربايجان بايراغي حاقيندا فيکري دييشه ده بيلردي. زامان ايچينده سياسي اولايلارين گليشمه سي ايله اينسانلارين فيکري و سياسي تحليلي دييشه بيلر. بو اولدوقجا طبيعی دير و سياسي اولايلاري گؤره گؤره زامانا اويغون و اونا گرکن تصميملر توتا بيلمه يه نلر بئيني داش فاناتلاردير.
بايراق طرحي حاقيندا ائلچي به يين آديني بو قدر چکملکه اونا قوتسالليق وئرمک ايسته گينده دئييلم. يالنيز سون زامانلاردا بو مسئله گوندمه گلديگي ايچين فيکيرلريمي يازماق ايسته ديم.
باشقا بير سوال!
نييه کئچن ايللرده باب تشکيلاتيندا اولان بعضيلري بو گون دئييلن طرحين باب-ا باغلي اولدوغونو دانيرلار؟ ندن ائلچي به يين بو طرحي قبول ائتمه ديگيني دئييرلر؟
باب تشکيلاتيندا مسئول شخصلر کيمي چاليشانلار گونئي آذربايجان بايراق طرحي نين کيتابدا گلديگيني هر هانسي ندنه گؤره ضررلي و خطرلي گؤروردولرسه ائله کيتاب چاپ اولمادان اؤنجه ائلچي به يه دئيرديلر!! بو ايشين يالنيش اولدوغونو آچيقلايارديلار! و يا سونرالار باب آدينا رسمي بيانات ياييملايارديلار! آما بو ايشلرين هئچ بيريسي اولماميشدير! دئييلن کيتاب گونئي آذربايجاندا الدن – اله گزيب اوخونموش و مينلر ساييدا کپي اولونموشدور و زامان ايچينده کيتابين ايچينده گئدن بايراق طرحي باب-ا باغلانميشدير.
ائلچي بي 2000 ايلينده دونياسيني دييشديکدن سونرا باب تشکيلاتي نين ايچينده بير چوخ ضعفلر يارانميشدير. بو ضعفلردن بيريسي تشکيلاتين ايچينده عوضولرين بير بيرييله ريقابته گئچمه سي اولموشدور. بعضي ندنلر اوزوندن و منم منمليکلرين چوخالماسي ندني ايله آز زامان داخيلينده باب تشکيلاتي اپريميش و داغيلميشدير. بو گون ايسه شخصي مسئله لرله باغلي همن منفي ريقابتلر دئييلن بايراق طرحي اوزرينده اؤزونو نوماييش ائتديرمکددير. گونئي آذربايجان ميللي حرکتي نين بيرليگيني آرزو ائدن هر ميلتچي، شخصي دعوالاردان اوزاق دوروب و يالنيز آذربايجاني و اونون حيثييتيني دوشونمه ليدير. شخصي موناسيبتلرله چيخيش ائدنلر و اؤز شخصي ماراقلاريني آذربايجان ميللي حرکتينه داخيل ائدنلر بو ايشلرين ضرر وئريجي اولدوغونو باشا دوشوب بؤلگه ميزده سياسي اولايلارين نه قدر حساسلاشديغيني گؤروب و ميللي بيرليگين يارانماسينا تلاش ائتمه ليديرلر.
آشاغيدا گلن يازي گونئي آذربايجان بايراغي اؤنريسيني آچيقلاماقدادير. دئديگيميز کيمي بو سطيرلر " موختصر آذربايجان تاريخي " کيتابيندا گلميشدير و بونلاري رحمتليک ائلچي بي اوخودوقدان سونرا کيتابين باب تشکيلاتي طرفيندن چاب اولونا بيلمه سينه ايذين وئرميشدير. بو سطیرلر کیتابین اؤن سؤزونده گلمیشدیر:
"بیراز دا دا کيتابين اوز قابينداکي بايراقدان صؤحبت آچماق ايسته ييرم. بوگون شوکور آللاها کي، تورپاقلاريميزين شيمال حيصه سينده برپا اولموش دؤولتيميز اؤز بايراغي آلتيندا آزاد ياشايير. معلومدور کي، بايراغيميزداکي ماوي رنگ تورکلشمه ني، قيرميزي رنگ موعاصيرلشمه ني و ياشيل رنگ ده ايسلاملاشماني تمثيل ائدير. تورکلشمک، موعاصيرلشمک، ايسلاملاشماق پرينسيپلريني علي بي حسين زاده توران اورتايا آتميش و تورکييه نين مشهور سوسيولوقو (ايجتيماياتچي) ضيا گؤي آلپ سيستملشديرميش و محمد امين رسولزاده ده حياتا کئچيرميشدير. قيرميزي حيصه نين اورتاسيندا هيلال شکلينده کي آی آزادليغين تيمثاليدير. اونون قارشيسينداکي سککيز گوشه لي اولدوز ايسه تورک ميلتي نين دؤولت آنلاييشي ايله باغليدير. تورکون دؤولت آنلاييشيندا دؤرد اساس يؤن (جهت)، دؤرد ده آرا يؤن واردير. بو يؤن آنلاييشي دا تورکون جهان حاکيميتي ايدئياسي ايله سسلشير. تاريخلر بويو ياراتديغيميز 16 ايمپئرييا و قوردوغوموز يوزلرله دؤولت ده بيزيم حاکيميت آنلاييشيميز باره ده کيفايت قدر شعور يارادير. بير سؤزله تورک ميلتيني آللاه ياراديب کي، جهاندا حاکيم اولسون و اونون ايلاهي عدالتيني يئر اوزونده برقرار ائتسين.
تورکلرين افسانه وي سرکرده سي و دؤولت خاديمي، هون ايمپئريياسي نين خاقاني مته (اوغوز خان) اطرافداکي تورک طايفالاريني اؤزونه تابع ائديب قاييتديقدا دئميش: ياي چکن طايفالاري بيرلشديرديم، هاميسي هون اولدولار. بوندان سونرا گؤي چاديريميز، گونش توغوموز (بير نؤوع بايراق) اولسون.
اورخون – يئني سئي آبيده لرينده بيلگه خاقان آبيده سي نين شيمال اوزونده ايسه بئله دئييلير: يوخاريدا تانري، آشاغيدا يئر بويوردوغو اوچون، ميلتيمي گؤزونون گؤرمه ديگي، قولاغي نين ائشيتمه ديگي يئرلرسه، ايره ليده (شرق) گون دوغانا، بريده (گونئي) گون اورتاسينا، گئريده (غرب) گون باتانا، يوخاريدا (شيمال) گئجه اورتاسينا کيمي آپارديم.
يئنه کول – تيگين آبيده سي نين گون دوغان اوزونده دئييلير: اوستده ماوي گؤي اوزو، آلتدا قارا يئر ياراديلديقدا، ايکيسي نين آراسيندا اينسان اوغوللاري ياراديليب. اينسان اوغوللاري نين اوستونه ده بابالاريم بومين خاقان ايله ايسته مي خاقان حؤکمدار اولوب، تاختدا اَيله شيبلر. تاختدا اوتوروب تورک خالقي نين دؤولتيني و قانونلاريني نيظاما – قايدايا ساليبلار. دؤرد بوجاق دوشمن ايميش. اوردولار يئريديب دؤرد بوجاقداکي خالقلاري باسيب هاميسيني اؤزلرينه موطيع قيليبلار. باشليلارا باش اَيديريبلر، ديزليلره ديز چؤکدوروبلر.
بو جور ايفاده لرله دولو نومونه لردن يوزلرله سيني، مينلرله سيني تاريخيميزدن گؤتوروب تقديم ائده بيلريک، لاکين بو اوچويله کيفايتله نيريک. هر اوچ سندده ايره لي سورولن فيکيرده، تورک ميلتي نين تانري نين عسگري اولماسي نيشان وئريلير. بو شعور تورک ميلتيني تاريخ بويو هم بلالارلا اوزلشديريب، هم ده اونو ابدي و مغلوب ائديلمز قيليب، قورويوب - ساخلاييب، تاريخين هر جوره سيناغيندان اوغورلا چيخارتميشدير. تورک دونياسي نين بؤيوک رهبري موصطفي کمال آتاتورک، " نه موتلو تورکوم ديينه " ، يعني (تورکم دئين خوشبختدير) شکلينده کي سؤزويله ده، همين شعورو تورکلرين بئينينه حک ائتمک فيکريني گودمورمو؟
بايراغيميزداکي آي و اولدوزون آغ رنگده اولماسي دا تصادوفي دئييلدير. آغ رنگ، بيزيم ان قديم ايناميميزا اساسا اولولوق، عدالت و گوجلولوگون رمزيدير. او هم ده پاکليغين و حؤکمرانليغين سيموولودور. قاراخانلي دؤولت خاديمي بالاساقونلو يوسيف خاص حاجيب، " کوتادقو بيليگ " آدلي اثرينده دئيير: قارا، قول (خالق، تبعه، رعيت) رنگيدير، حؤکمدار آغ اولار. آغلا قارا بير – بيريندن نه جور آسان سئچيلرسه، حؤکمدار دا اونون کيمي اوستون وصفلرله، اردملرله آسان شکيلده خالقدان فرقلنمه ليدير.
بوردا يئري گلميشکن دئمه لييم کي، اورخون – يئني سئي آبيده لرينده ايشله ديلن " قارا بودون " ، ديليميزده ايندي ده هميشه ايشلتديگيميز " قارا جاماعات " سؤزلري، " قارا " رنگين خالقي تمثيل ائتديگيني ثوبوت ائدير.
کيتابين اوز قابيندا چاپ اولونموش بايراغين آي و اولدوزو قارا رنگه بويانميشدير. البته آذربايجانين شيمال طرفي نين بايراغي عئينيله جنوب طرفين ده بايراغيدير. آنجاق اوردا بيزيم ايستيقلاليميز، حؤکمرانليغيميز و عدالتيميز فارس اسارتي آلتيندادير. اونا گؤره ده گونئي آذربايجانين اسارتينه ايشاره ائديله رک بير ياس علامتي کيمي بايراغيميزين آي و اولدوزو قارايا بويانيبدير. بيزيم فيکريميزجه، گونئي آذربايجانين آزادليغي اوغروندا موباريزه آپاران و يا بو يولدا موباريزه ائدنلره قوشولا بيلميين؛ آنجاق اورگي اونلارلا بيرگه دؤيوننلرين بايراغي ياسدا اولماليدير. البتته کي، اوردا ياشييان هر تورک بو اسارتدن خيلاص اولماغين يولونو تورکمن چايدان اوزو بري آختاريب، هله ده آختارير. هاچان کي، گونئي آذربايجان اؤز موستقيلليگينه قوووشدو، او واخت بايراغيميزداکي ياس علامتي اولان قارا گؤتوروله جک، آي و اولدوزوموز اؤز آزادليغينا قوووشاجاقدير. بوندان، يعني ايشله ديلن " اسارت " ايفاده سيندن خوشو گلمه يه نلره ده بير جوت سؤزوم واردير:
بيز، دونياني لرزه يه گتيرميش، ايلاهي حاق و عدالت اوغروندا بورجلر داغيديب، خانيمانلار ييخميشيق؛ مظلوملارين گؤز ياشيني روان ائدنلرين آناسيني آغلار قويموشوق. بيز، دونيانين ان نجيب، ان عاليجناب، ان قودرتلي و موترقي ميلتي ييک. ظاليملرين قنيمي، مظلوملارين دوستويوق، آرخاسيييق. ستار خانين، شيخ محمد خياباني نين، عموغلونون، بهرنگي نين، زهتابي نين قبيرلري دوشمن تاپداغيندادير. ديلينه قاندال وورولموش، غئيرتي تاپداق اولموش، ميللي کيمليگي دانيلميش، ميللي مدنيتي تحقير اولونموش، عادي " تورکه {…} اولموش اسير دئييلديرسه بس ندير؟! بو تحقيره دؤزنلر و يا اونو اودان قارين قوللاري بيزدن دئييلدير…!
تورک آدلانان و تانري طرفيندن اؤزونه اوردو ياراديلان بو ميلته منسوب اولدوغومدان ايفتيخار حيسي دويوب، آللاهيما دا نهايتسيز درجه ده شوکر ائديرم.
گونئي آذربايجانين آزادليغي يولوندا يئريين مرد اوغوللارا، پاک، نزاکتلي و کيشي دياناتلي قهرامان قيزلاريميزا عشق اولسون.
+
یازیلئب دئر چهارشنبه 16 مرداد1387ساعات 16:56 تبریزسسی توسط ایله
|
