تبریز سسی : گئچمیش ایللرده گونئی آذربایجانی بین الخالق تشکیلاتلاردا تمثیل ائتمک اوچون بعضی تشکیلاتلار طرفیندن نئچه بایراق اؤنریلمیشدیر.
هامیمیزین بیلدیگی سببلره گؤره بو بایراقلار میلی فعاللارین چوخونو بیر یئره ییغا بیلمه میش هم ده بعضی حاللاردا چوخلاریمیزی بیر بیریمیزه قارشی قویموشدور. بایراق بؤحرانی نین حلی گئچنلرده هامینی دوشوندورسه ده بو گونه دک بو بؤحران حل ائدیلمز قالمیشدیر. سؤزو گئدن بؤحرانین حلینی دوشونن بیر قروپ میلی فعالیمیز بیر چوخ سیاسی مسئله لری دیقته آلاراق اؤتن گونلرده میللتیمیز و میلی فعاللاریمیزا بیر بیلدیری ایله مراجیعت ائتمیشلر. الده ائدیلن بیلگیلره گؤره بو مراجیعت گونئی آذربایجانین میلی فعاللار و فعال چئوره لر آراسیندا استیقبال اولونموشدور. بو آرادا گونئی آذربایجان میللی فعاللارینین سوندوغو میلی سیمگه چوخ درین و اطرافلی سؤز و موباحیثه لره ده سبب اولموشدور. دئمک بو مسئله بو گون گونئی آذربایجان میلی حرکاتی نین ان جیدی موضوعسونا دؤنموشدور. سونولان میلی سیمبول حاقیندا چوخلو مثبت و موافیق نظرلر اولسا دا خصوصاً گونئی آذربایجاندان دیشاریدا بعضی تنقیدی نظرلر ده وئریلمیشدیر. گونئی آذربایجان میلی سیمگه سی موضوعسونون اؤنملی اولدوغو اوچون طبیعی دیر کی بوتون موافیق و موخالیف نظرلر آلینیب و سونوندا سؤزو گئدن میلی مسئله میز اؤز طبیعی و دوزگون یولوندا حل اولونمالیدیر.
میلی سیمگه مسئله سی فعاللار، سیاسی محفللر و اینترنت سیته لرینده موباحیثه یه قویولسا دا سون گونلرده گوناذ - تی وی نین مسئله نی موذاکیره چیخارداجاغی خبری مسئله نین داها جیدیه آلینماسینی گؤسترمکده دیر. بیز یقین بیلیریک کی، بوتون موباحیثه لر نهایتده میلی سیمگه بؤحرانیمیزین آرادان گؤتورولمه سینه یاردیم ائده جکدیر. بو مسئله نی تأکید ائدرک اؤنملی بیر قونویا توخونماق ایستردیک. بیلدیگیمیز کیمی میلی سیمگه گونئی آذربایجانین بیر قروپ میلی فعاللاری طرفیندن و گونئی آذربایجاندان اؤنریلمیشدیر. اونا گؤره ده بو ایشی حیمایت ائدن و دستکله ینلرین چوخوسو گونئی آذربایجاندادیرلار. بیز بیر قروپ فعال اولاراق گوناذ تی وی – یه اؤز تشکورلریمیزی بیلدیریر و سیاسی مولاحیظه لره گونئی آذربایجاندان میللی فعاللارین چوخونون طبیعی اولاراق دئییلن پروقراما قاتیلا بیلمه یه جه یینی خاطیرلادیریق
.
تبریز 16/5/1387 – بو بیلدیرینی بیر قروپ میلی فعاللار یایدیلار.
+
یازیلئب دئر پنجشنبه 17 مرداد1387ساعات 17:9 تبریزسسی توسط ایله
|
