| تبليغات | X |
تبریز سسی : گونئی آذربایجان میلی سیمگه سی ایله باغلی موباحیثه لر سورمکده دیر. بو موباحیثه لر اؤزللیکله گونئی آذربایجاندا میلی فعاللار آراسیندا داها حساسیتله دوام ائتمکده دیر. بلکه ده بو موباحیثه لرین چوخ آز فاییزی نئت دوشرگه لرینده اؤزونو گؤستریر. گونئی آذربایجان میلی سیمبولو حاقیندا هر کس اؤز نظرینی وئرمه یه حاقلی دیر. بلکه ده بیر چوخ تشکیلاتلاریمیزین ان اؤنملی ساییلان وظیفه لریندن مسئله ایله باغلی نظرلرینی وئرمکدیر. بو آرادا قوروم و تشکیلاتلارین میلی سیمبول حاقیندا وئردیکلری نظرلر موختلیف اولا بیلر. نظرلر فرقلی لییینه وارمادان بو مسئله نین اؤزو اولدوقجا اؤنملی حئساب اولونمالیدیر. تشکیلاتلارین سوسماماسی اونلارین بو اؤنملی مسئله یه مسئولیت ایله یاناشماسی آنلامیندادیر. آذربایجان فدرال دموکرات حرکاتی تشکیلاتی 2008-08-12 تاریخینده میلی سیمبول یا میلی بایراق حاقیندا اؤز نظرینی"بایراق حاقیندا گئدن موباحیثه لره سون قویماق لازیمدیر" باشلیغی ایله یایمیشدیر. سؤزو گئدن تشکیلاتین وئردییی بیاناتی اوخودوقدان سونرا نئچه سورغو بئینیمده جانلاندی. یازماماغا نه قدر چالیشدیمسا اولمادی!
بوردا بیر داها تأکید ائدیریم کی بیزلردن هر بیریمیز اؤز نظریمیزی وئرمه یه حاقیمیز وار و اؤزللیکله تشکیلاتلاریمیز بو حاقدا داها سوروملولوق حیسی ایله مسئله حاقیندا نظرلرینی وئرمه لیدیرلر.
آذربایجان فدرال دموکرات حرکاتی یایدیغی بیاناتدا گونئی آذربایجان میلی بایراغی یا سیمگه سینین سئچیلمه سینی یالنیز گونئی آذربایجانین میلی مجلیسی نین وظیفه سی و ایشی بیلیر. یعنی سیاسی فعاللار و قوروملارین اکثریتی نین بیر سیمگه یا بایراق اوزرینده توافوقونو حقوقی نظردن دوغرو بیلمیر. اونا گؤره ده مسئله ایله باغلی بوتون تلاشلاری یئرسیز بیلیب و انرژیلرین هدره گئتمه سی کیمی گؤرور. بو تشکیلاتین بیاناتیندا بئله سؤزلر ده دئییلمیشدیر: "بوگون آذربایجان خالقی نین دوشمن لری، و اونون باشیندا ایران ایسلام جمهوریتی، چالیشیرلار کی آذربایجان آکتویستلرينين باشينى ضرورتی اولمایان مسئله لرله قاتسينلار، آذربایجان فعال لارینین انرژی سینى لازیم اولمایان يوللاردا هدره وئرسينلر و اونلارين صفلرينى پارچالاسينلار".
من بیر سیراوی فعال اولاراق بو بیاناتی یایان حؤرمتلی تشکیلات سوروملولارینا نئچه سورغو وئرمک ایستردیم.
بلکه گونئی آذربایجان 20 یا 50 ایله دک میلی مجلیس صاحیبی اولمادی، او گونه دک بیزه میلی سیمگه یا میلی بایراق لازیم دئییل می؟ بوگون آرادا اؤنریلن نئچه بایراق وار، بونلار ایختیلاف تؤره دن اولمامیشلارمی؟ سیزجه گله جک ایللرده آیری بایراقلار اؤنریلمه ییب و داها آرتیق آرانی قاتمایاجاقلارمی؟ سیز بونا امین می سینیز کی یئنی بایراقلار یارانمایاجاق و ایختیلافلار داها آرتیق چوخالمایاجاقدیر؟ البته کی میلتیمیزین دوشمنلری همیشه طبیعی اولاراق میلی فعاللاریمیز آراسیندا ایختیلاف سالماق ایسته میش و موختلیف ساحه لرده میلی حرکته ضربه وورماق ایسته میشدیر. سیز دولاییسیلا میلی سیمگه اطرافیندا دانیشانلاری دا دوشمنلرین و ایران ایسلام جمهوریتی نین سیاستلرینه اویموش بیلیب و مسئله نین آذربایجان فعاللارینین صفلرینین پارچالانماسینا سبب اولدوغونو ادعا ائتمیشسینیز. بو ادعانیزی ایثباتلاماق اوچون الینیزده هانسی سندینیز وار؟ آذربایجان میلی فعاللاری آراسینداکی هانسی اتفاق و بیرلیک وار کی پوزولسون؟ دوشمن هانسی بیرلییی و هانسی صفلری پوزماق ایسته ییر؟ سیز هانسی بیرلیکدن سؤز آچیرسینیز؟ اصلینده میلی حرکت فعاللاری چوخلارینی میلی سیمگه اطرافیندا بیرلشدیرمک و میلی بیرلیک یاراتماق اوچون بو آغیر ایشه قاتیلمیشلار. میلی سیمگه و بونا اوخشار مووعضوعلار حاقیندا میلی حرکت ایچینده یئرلشن فعاللار و تشکیلاتلار ساغلام و دموکراتیک بیر اورتامدا دانیشیقلار آپارماغی باجارمالیدیرلار. بلکه بوگون آرادا بعضی ضعفلر وار آما بیز بونو زامان ایچینده تمرین ائتمه لی و اؤیرنمه لیییک.
.........
حؤرمتلی آذربایجان فدرال دموکرات حرکاتی تشکیلاتی
بیر چوخ میلی چالیشقانلار و قوروملار واحید بیر سیمگه نین اولماسی ضرورتینی تأکید ائدیرلر. بلکه ده سیمگه وارلیغینین ضرورتینی دانانلارین ساییسی لاپ آزدیر. سیز ده بو سیرادا یئرلشیرسینیز. سیمگه نین ضرورتینی ساوونانلار و حتی لازیم اولمادیغینی دئینلر جیدی اولاراق بیر بیرینه حؤرمتله یاناشیب علمی موباحیثه لر آپاریرلار. سیز بوتون بو اینسانلارا نظر فرقلیلیکلرینه باخمایاراق حؤرمتله یاناشیب ایتهامسیز و .... اؤز گؤروشونوزو اورتایا قویسایدینیز یاخشی اولماز می دی؟ ...
خزر گونئیلی
2008-08-14
 |
|
|