| تبليغات | X |
تبریز سسی : بو گونلر بايراق دارتيشمالاري اينتئرنئت سيتهلرينده گوندهمه گلن مسئلهلردن بيري کيمي بير سيرا فعاللاري اؤزونه مشغول ائتميش. بيز (بير سيرا) سولدوزلولار، فارس شؤونيمزمينين ميللي و مدني باسقيسي آلتيندا ياشاماقلا ياناشي کورد تئروريزمي ايله ده قارشي ـ قارشييا موباريزه آپارماقداييق. اولسون کي، حرکتده پراتيک ايشلرده اؤنجول اورتاما ماليک اولان سولدوزلولار بئله بير قونولاردا هاميدان سونرا خبرلري اولور و ايش بيتندن سونرا اونلاردان دا نظر ايستهنيلير، آما يئنه ده بو نئچه آي ايچريسينده بو قونو ايله موخاليفتده بولونان و بو قونو ايله سسلهشنلرين نظرلريني گؤزدن کئچيرديکدن سونرا بيز بئله دوشونوروک کي، بير سيرا موخاليفتده بولونان فعاللار کيمي، «هله بئله بير مسئلهلرين زاماني گلمهميش و بيرباشا بئله بير دارتيشمالارا قاتيلماق ميللي حرکت اوچون يارارلي اولا بيلمز»، ايفادهلري ده قبول ائده بيلميريک.
بو بايراق (آی و اولدوزو قارا اولان بايراق) بير تشکيلات ساريندان يوخ، بلکه بير سيرا موستقيل فعاللار ساريندان اؤنريلدييي اوچون، هم ده بيرلييه چاغيرا بيلهجک بير آدديم کيمي تقديره لاييق گؤرولدويو اوچون، هابئله هئچ بير تشکيلاتا باغلي اولمايان بايراغين بيزي بيرلييه ساري آپاراجاغيني نظره آليب اونون اولماسينا موخاليفتده بولونماماغيميزي دوشونوروک.
دوغروسو، «چوخ ساده ايشلري گؤره بيلمهديييميز حالدا، بئله اؤنملي مسئلهيه قاتيلماق، بيزجه، او قدر ده يئرلي دئييل» - دئمکله، بو قونودان قاچماغي دا دوزگون بير حرکت سايميريق!
بيز ده سئورديک کي، گونئي آذربايجاندا ميللي مجليس ياراناندان سونرا بئله بير ايشه ال آپاريلاردي. آما اينديکي دورومو نظره آلارساق، بو تئزليکده ميللي مجليس قورماق مسئلهسي بير يوخو کيمي نظره چارپديغي زاماندا اوندا نه ائتمهليييک؟ بلکه باشقالارينين(کورد تئروريزمينين و ...) بيزه بايراق سئچمهسيني گؤزلهمهليييک!
بايراق قونوسو گونئي آذربايجانين بوگونکو مسئلهسي اولماسايدي دا، آرتيق بو گون بير مسئلهيه چئوريلميش. بير ياندان دا بونلارا باخماياراق، بايراق قونوسو بوگون گونئي آزربايجاندا بير سيرا قئيري دئموکراتيک حرکتلر آزالسين ـ دئيه، بئله بايراغين بو شکيلده اؤنريلمهسي، بيزجه، بيزي بير آز دموکراتيکلييه دوغرو آپارا بيلهجک. بيز ده اونون بو اولوملو يؤنونو نظره آليب، اونون بير ميللتين تاريخي، مدني و سياسي وارليغيني بير ميللي سيمگه کيمي يانسيداجاغينا اينانيريق.
بيز بير سيرا سولدوزلو موستقيل فعاللار بو سيمگهنين قبول ائتمهسي ايله باشقا تشکيلاتلارين وارليغيني رد ائتمير و اونلارا هر زامان سايغيدا بولونماغيميزي بيلديريرک، آما داها چوخ دئموکراتيکلييه ساري گئدن حرکتلري دستکلهمهيي ميللي منافعيميز اوچون يارارلي گؤروروک.
بو باخيش يالنيز هئچ بير تشکيلاتا باغلي اولمايان بير سيرا سولدوزلو فعاللارا عاييددير.
 |
|
|