تبریز سسی : "میللی سیمگه اونریسی یا میللی سیمگه سوخوشدورماسی"  یازیسینا تنقید

بیر مودت بوندان اؤنجه "آذوح" اینترنئت سایتیندا ائلچین اورمولو قلمی ایله "میللی سیمگه اونریسی یا میللی سیمگه سوخوشدورماسی"(1) عنوانی ایله بیر یازی درج اولونموشدور. دئیه سن بو یازیدا چوخ اؤنملی موضوعلار وارمیش! اونا گؤره بعضیلری بو یازینی نئچه دفعه ایمایل قروپلارینا یاییرلار! بو یازی اؤزونو آپ آچیق ایفشا ائدیر. بونونلا بئله اونون حاققیندا نئچه مسئله یه ایشاره ائتمه یی لازیم گؤرورم. قوی حؤرمتلی اوخوجولار اؤزلری قضاوت ائدیب و دوزو اگریدن سئچسینلر.

گونئی آذربایجان بایراق قونوسو بعضیلرینین یئرسیز و اؤز باشینا عمللری نتیجه سینده دولاشیق دوروما دوشموشدور. قونو ایله باغلی نئچه آیین ایچینده فعاللار و تشکیلاتلار آراسیندا گئنیش شکیلده چوخ ماراقلی و علمی موباحیثه لر اولموشدور. بعضی قروپلار ساکیت قالسا دا بعضیلری موافیق یا موخالیف نظرینی اورتایا قویموش و سؤزلرینی دئمیشلر. بو آرادا بعضی چئوره لرین شخصی یا تشکیلاتی منفعتلری خطره دوشدویو اوچون موباحیثه لرین موثبت دورومونو انگلله مک اوچون اللریندن گلنی اسیرگه مه میشلر. هر شئیدن اؤنجه بونو نظرده توتمالیییق کی یامان - یوووز یازماقلا، باشقالارینی تهدید ائتمکله آذربایجانین هئچ بیر مسئله سی حلل اولونماز. دانیشماغی و تمیز دانیشماغی باجارمایانین سؤزونه ده کیمسه قولاق وئرمز.

حؤرمتلی ائلچین بی!

گونئی آذبایجان سیموولو حاققیندا یاییلان موراجیعتین "بای بک " سیته سی ایله هئچ بیر باغلیلیغی یوخدور. سیموول حاققیندا یاییلان موراجیعت گونئی آذربایجانین ایچینده و بیر قروپ موستقیل فعاللار طرفیندن یاییلمیشدیر. بو موراجیعتی نئچه اینتئرنت سایتی(2) ایله بیرگه حؤرمتلی " بای بک " سیته سی ده درج ائتمیشدیر. "بای بک" سیته سی یاییلان موراجیعتی سونرالار یایمیش و بو موراجیعتدن باشقا اؤزو ده "بای بک" اولاراق آیری چاغریش یایمیشدیر.

موراجیعت بیر قروپ موستقیل میلی فعاللار آدی ایله یاییلمیشدیر. سیزین نیتینیز پاکدیرسا بو موراجیعیتین مؤحتواسینا و اوندا گئدن حاقلی سؤزلره باخینیز. آغیر سیاسی دورومون ایچینده بو کیمی ایشی گونئی آذربایجاندا کیم اؤز آدی ایله گؤره بیلردی؟ یقین کی کیمسه بو ایشه اؤز آدی ایله قاتیلا بیلمز. سیزدن سوروشورام. سیز نه اوچون اؤز آدینیزلا یازمیرسینیز؟ من سیزی تاخما یا قوندارما آدلا یازدیغینیز اوچون تنقید ائدیب یا ردد ائتمیرم. سیزین آدینیزی دئییل ، یازینیزی و اونون مؤحتواسینی تنقید ائدیرم. توتالیم کی بو ایشی نئچه نفر یا هر هانسی بیر قروپ یا تشکیلات اؤز آدی ایله یاپاردی. اوندا نئجه اولاجاقدی؟ آیا آرادا منم منملیک یارانمازدی؟ فعال تشکیلاتلار، حئییفلر اولسون کی قوروملار و شخصلر آراسیندا او قدر دیدرگینلیک و یاراماز رقابتلر وار کی هئچ کس بو راحاتلیقلا آیریسینی قبول ائتمیر. بئله بیر دورومدا هر کس اؤز آدی ایله سیموول حاققیندا موراجیعت یاییملاسایدی سؤز سوز کی هئچ بیر گلیشمه اولمازدی. موراجیعتی یایانلارین جسارتلرینین اولمادیغینی دئییرسینیز. اونلار چوخلارینین بیلدییی و اعتیرافینا گؤره موراجیعت یاییلمادان اؤنجه بیر چوخلاری ایله مشورتلر ائتمیشلر. بو فعاللاری جسارتسیزلیگه ایتهاملاندیرماق اینصافدان اوزاقدیر.

موراجیعتده اؤنریلن سیموول طرحینده آی و اولدوز قارا رنگده دیر. بونون اویغون و گؤزل آنلامی دفعه لرله آچیقلانمیشدیر(3). موراجیعتده دئییلدییی کیمی بو طرح گونئی آذربایجان ایستیقلالینا قدر موقتی سیموول اولاجاقدیر و ایستیقلالدان سونرا پارلمان مسئله نین نئجه لییی حاقدا چوخ راحات هر هانسی تصمیمی توتا بیله جکدیر. مسئله بو قدر آچیق و نئتدیر، آمما بعضیلری دئیه سن آرانی قاتماق و چوخلارینی چاش باش سالماق اوچون آند ایچمیشلر. سؤزو گئدن طرح هئچ بیر تشکیلات و چئوره یه باغلی اولمادیغی اوچون رقابت دوغورمور.

1918– ده قوزئی آذربایجان بایراغی سئچیلن زامان آذربایجانین بؤیوک اینسانلارینین رولو اولموشدور. بونلارین ایچینده قوزئیلی سویداشلاریمیزلا یاناشی گونئیلیلرین ده او جومله دن رحمتلی فتحعلی خویلو- نون تأثیری اولموشدور. توتالیم کی، بو مسئله ده هئچ بیر گونئیلینین تأثیری بئله اولمامیشدیر. بو، مسئله نین ماهیتینده نه یی دییشیر؟ گله جکده ایکی آذربایجانین بیرلشمه سی هدفینی چوخلاریمیز قبول ائدیر و بونا اینانیریق. اونا گؤره ده طبیعی اولاراق بوتؤو آذربایجانین بیر بایراغی اولمالیدیر. واختی ایله ایکی آذربایجان لازیمی و موعین پروسئسدن سونرا بیرلشدییی زامان بو مسئله نی سوروملو و صلاحیتلی اورقانلار و شخصلر یاپاجاقلار.

رحمتلیک ائلچی بی و گونئی آذربایجان بایراغی ایله باغلی کئچنلرده بول بول یازیلمیشدیر(4). سیموولو اؤنرنلر هئچ ده بئله دئمیرلر کی، ائلچی بی بو بایراق طرحینی بیندیگی اوچون بو طرح گونئی آذربایجان سیموولو کیمی سئچیلمه لیدیر. موراجیعتی یایان فعاللار سونرالار یایدیقلاری بیلدیریده وورغولامیشلار کی، رحمتلیک ائلچی بیین بو بایراق طرحینین یاییلماسینی تصدیق ائتمه سی اؤنملی اولسا دا، آنجاق اونا مشروعیت وئرمیر و بو طرح گونئی آذربایجان فعاللاری و تشکیلاتلارینین اکثریتی نین تصدیقلنمه سی ایله مشروع حئساب اولونا بیلر(5). میللی فعاللارین ایشلرینده بو قدر تمیزلیک و دئمکراتیک باخیش اولا اولا نه اوچون بونلاری ناحاقجاسینا انگلله ییرسیز؟ سؤز بوندان گئتمیر کی کیسمه نین بونا قارشی چیخماسینا حاققی یوخدور. سؤز بوندادیر کی هر کس هر هانسی سؤزونو تمیز و منطیقلی بیان ائتمه لیدیر. بایراق کیمی بؤیوک مسئله ده البته کی اورتایا قویولاجاق نظرلر موختلیف اولا بیلر.

توتالیم کی چوخلاری گونئی آذربایجانا بایراغین اولماسی ضرورتینی گاموح- دان اؤیرنمیشلر. نه اولور کی هر کس باشقاسیندان اؤیره نه بیلر. گاموح- دان اؤنجه گونئی آذربایجانا بایراق اؤنره نلر اولموشدور و گاموح ایلک اولاراق بونو یاپمامیشدیر. دونن بابک قالاسینین ایللیک مراسیمینده کوتله نین شور و حیسیاتیندان یارارلانیب بایراق قالدیرانلارین چوخوسو بوگون همن بایراغین جیدی تنقیدچیلری و حتی موخالیفلری اولموشلار. بو حاقدا بوللو بوللو یازیلار و چیخیشلار وار. نئچه ایلین ایچینده گاموح-ون اؤنردییی بایراق نه اینکی باشقالارینین حیمایه سینی قازانا بیلمه دی، بلکه الده ائتدیگی حیمایه لری ده الدن وئرمیش اولدو. 

حؤرمتلی ائلچین بی!

یازینیزین بیر یئرینده اوزونوزو موراجیعتی یاییملایان فعاللارا توتوب یازیرسینیز کی " هانکی ایشی گونئیده گؤروبسوز؟" ، و سونرا ایسه یازیرسینیز کی : " بس نییه ائلچی بی تأیید ائدن گونئی آذربایجان میللی حرکاتی نین رهبری (دکتر چهره قانلی نی) یالقیز قویدوز؟؟". قریبه ایشدیر! سیز احتیمال ائدیرسینیز کی سیموول موراجیعتینی حاضیرلایان فعاللار اؤنجه لرده دوکتور چهره قانلی نی حیمایه ائدیرمیشلر. بؤیله ایسه اونلار گونئیده فعال ساییلا بیلرلر و اوندا سیزین اونلارا "هانکی ایشی گونئیده گؤروبسوز؟" دئمه ییینیز دوغرو اولا بیلمز! فرض ائدک کی، سیزین احتیمالینیز دوزدور. حؤرمتلی دوکتور چهره قانلی و گاموح -دان یانلیش عمللری و اینحیصارچی باخیشلاری اوچون چوخلاری آیریلدیلار. رحمتلیک ائلچی بی ده چوخلاری کیمی گونئی آذربایجان میللی حرکتینین چیخارلاری اوچون واختی ایله دوکتور چهره قانلی نی حیمایه ائتمیشدیر. بو دوکتور چهره قانلی نین همیشه لیک تأییدی کیمی قیمتلنمه مه لیدیر.

گلین هامیمیز اؤز شخصی و تشکیلاتی منفعتلریمیزی گودمه یک. هامیمیزین ایشی قالاجاق و صاباحکیلار بوگونوموز حاققیندا حؤکم ائده جک.. هر هانسی سؤزونوز یا باخیشینیز وارسا تمیزلییی ایله دئیین. بلکه بعضی سندسیز و یانلیش سؤزلرینیزله بیر نئچه سینی آلدادیب دوغرو یولدان آزدیراسینیز ، آمما میللی فعاللارین اکثریتی بئله دئییللر. گونئی آذربایجان میللی سیموولو تام جسارت و تمیزلییی ایله بایراق مسئله سینین حللی اوچون اؤنریلمیشدیر. بو آرادا میللی منافعدن باشقا کیمسه نین هئچ بیر قازانجی یوخدور. بعضیلری معلوم هدفلر اوغروندا سیموولو تخریب ائتمک اوچون اللریندن گله نی اسیرگه میرلر. بیر عیده بو سیموول " قورتولوش " تشکیلاتینین اولدوغونو دئییر و هامینین آراسیندا رقابت سالماق ایسته ییرلر. همنلر باشقا یئرده سیموولو " دیره نیش " تشکیلاتینین اولدوغونو یاییرلار و ... بیر حالدا کی دیره نیش تشکیلاتی بوندان اؤنجه آپ آچیق مسئله یه آیدینلیق گتیرمیش و بو یالانچی سؤزلری تکذیب ائتمیشدیر(6). " قورتولوش " تشکیلاتی ایسه سیموولدان حیمایه ائدرک اونو اؤزونونکو بیلمه میشدیر. " میللی پارتی " و " باتی آذربایجان مودافیعه کومیته سی " و باشقالاری اؤنریلن سیمگه نی دستکله میش و اوندان حیمایه ائتمیشدیر. دوغروسو اؤنریلن سیموول اونو حیمایه ائدنلریندیر. بو سیموول "میللی پارتی "- نیندیر، بو سیموول " قورتولوش "- وندور، " باتی آذربایجان مودافیعه کومیته سی " - نیندیر و ...  

اتک یازیلار و قایناقلار:

1- http://www.azoh.net/meqaleler/habergoruntule.asp?bolum=247&katid=48

2- سیموول حاققیندا یاییلان موراجیعتی نئچه اینتئرنت سایتی عکس ائتمیشلر. اورنک اوچون وئریلیر:

http://www.azadtribun.net/x19167.htm-

http://www.gunaskam.com/az1/index.php?option=com_content&task=view&id=205&Itemid=1

3- http://www.oyrenci.com/Articles.aspx?articleId=912

4- http://www.gunaz.tv/pages/newsItem.php?t=news&id=7183

5- http://www.gunaz.tv/pages/newsItem.php?t=news&id=8026

6- http://www.11008.baybak.com/il_11008_say_501.azr

Proxy: http://a5o.info